考評局前日聲稱，中學文憑試成績已經納入英國大學及院校招生事務處UCAS嘅分數對照制度，即係話，英國大學以後可以按相若嘅級別嚟評核考試成績收香港學生嘞。

咦，第日留學英倫咪方便囉？咪咁開心住，英國官方學歷認可機構NARIC發現，中學文憑試評為合格嘅2級水平，根本未達到英國高考（GCE A-Level）嘅E級合格成績，就算達到第3級水平，亦只相等於人哋嘅E級。如果按現行本港高考標準計算，實際上已經「肥佬」，讀大學諗都唔使諗。

考評局講解咗近兩粒鐘，聽落唔止好亂，而且仲好得人驚添。NARIC早幾年嘅比較結果顯示，香港高考分數等級普遍較英國高考高一到兩個等級，依家推行新制，合格成績反而大貶值，你話唔驚就假！

考評局話，考生中學文憑試有兩科3級，已經夠資格入讀英國大學。不過升學專家就踢爆，以咁嘅成績，冇錯係攞到英國大學入場券，不過至多只能入讀排名六十以後嘅學校。就算考到5級成績，因為比英國本地學生讀少一年，可能焗住使多近廿萬元讀多一年基礎課程。係咁，中學文憑試咪盞攞嚟搞？

叮！其實中學文憑試本身並唔係問題，問題係當局自己「捉蟲」。嗱，殖民地時代本港實行英式教育，同英國學制銜接順理成章。回歸之後，港府推動「三三四」新學制，並且引入中學文憑試，話要同國際教育接軌，本來咁做完全冇錯，弊就弊在班官員個腦唔識轉彎。

既然要改制同國際教育接軌，考試成績梗要同美國、內地呢啲實行「三三四」學制嘅地方對照至啱數㗎，考評局居然仲係同英國對照，英國中學讀七年，香港讀六年，好似雞同鴨咁，根本唔同，比乜？點比？簡直係阿茂整餅，冇嗰樣整嗰樣。

叮！回歸之後，港府推行嘅教育改革閉門造車亂咁嚟，邊次唔係搵同學仔做白老鼠㗎？呢，淨係母語教學已經惹來滿城風雨，累到唔少同學英文唔得，中文同樣唔掂，當局卒之要整個莫名其妙嘅「微調」嚟補鑊。

呢次引入中學文憑試，當局又冇吸取教訓，唔講清楚分數標準同以前有乜唔同，甚至連考評局官員自己都矇查查，莫講家長同考生無所適從，僱主想請人更加抓晒頭。

係人都知，英國一向都係港府高官子女用公帑補貼出國讀書嘅主要目的地。明明係為市民添煩添亂，考評局都要去做，唔通真係想益番自己友？叮！