睇番份名單，其中新委任嗰兩個都係以一換一形式補替，而另一新增嘅委員就係上莊做旅遊業議會主席冇耐嘅胡兆英，佢入呢個諮詢委員會應該係頂替落咗莊嘅前主席何栢霆，但睇真啲何栢霆都喺名單之中喎！

平衡政治勢力？

按慣例係一換一嘅話，何栢霆應該冇得留低，事有蹊蹺喎！何栢霆係富貴黨黨員，而胡兆英就屬於退出富貴黨另起爐灶嘅經濟動力成員，唔通係為平衡政治勢力？之不過，政府消息話呢個都唔係好特別嘅安排啫，事關何栢霆對郵輪業好有認識，所以多個專業人士對委員會有好處。