相信大家仲記得立法會財委會早前通過高鐵撥款後，反高鐵人士圍堵立法會，運輸及房屋局局長Eva鄭汝樺同十九個建制派議員被困大樓六粒鐘，翌日凌晨喺警方人鏈護送下搭港鐵落荒而逃，混亂中佢哋變相搭霸王車。班議員事後話每人夾番四蚊畀港鐵以表清白，原來佢哋咁順攤嘔番啲車費出嚟係有內幕！
Eva同班議員喺十七號凌晨搭港鐵鬆人，原來立法會秘書處喺十九號就接獲一名市民投訴，話根據鐵路附例，只有港鐵員工、員工家屬同巡邏警員，搭港鐵先唔使畀車費，當日Eva同班議員由中環搭港鐵到金鐘冇畀錢確係開咗先例，仲講明要求部門跟進。投訴人又話當日嗰班警員協助官員同議員搭霸王地鐵，做咗幫兇。
但投訴人同時向秘書處表明呢次唔係投訴港鐵，只係提出上述兩點不滿，要求部門跟進。根據《香港鐵路附例》第十四條，任何人冇票進入和乘搭列車、冇繳付車費等，最高可罰款五千元。
可能因為呢個投訴，班議員至迫於無奈向港鐵回水四蚊雞，咁總好過賠五千蚊，點計都着數啲。