本文重點
香港愛滋病基金會將喺嚟緊三月二十六號舉行籌款晚會，當中會加插扮「金刀梁」梁智鴻大賽，扮嘢大賽旨在向擔任愛滋病基金會主席多年嘅金刀梁致敬，比賽當日金刀梁太太馮令儀有份做評判，而舉世知名嘅愛滋病專家何大一博士都會在場湊熱鬧，好多人已經諗住要參加。
冠軍可獲泌尿科手術名額？
要扮金刀梁唔難，事關佢中間分界嘅髮形深入民心，只要用髮乳梳番呢個頭再戴粗黑框黑鏡就已經好似，不過佢可掬笑容同筆挺西裝、雪白恤衫都好重要。
扮嘢冠軍嘅獎品仲未講得定，咁金刀梁係泌尿科專家，有人就講笑話不如送出由金刀梁操刀嘅手術名額一個啦，金刀梁有名你叫，佢做手術好貴㗎。金刀梁嘅細佬、公開大學校長梁智仁同哥哥成個餅印咁，即使唔化妝都贏硬啦，但當佢知道獎品係乜時，就立刻耍手擰頭話唔使客氣喎。