現任科技大學首席副校長錢大康，尋日獲香港大學校務委員會一致通過任命，會喺今年暑假正式過檔，職位同樣係首席副校長，任期五年。港大校務委員會主席梁智鴻、校長徐立之仲開記者會，話由四十個候選人入面揀咗大學行政經驗豐富嘅錢大康，可令港大再創高峰咁話。
錢大康經驗豐富就毋庸置疑，但佢都好坦白咁話對港大嘅行政架構唔係咁了解，可以話係一個外人，亦都因為咁，佢希望將來可以引入新思維，除帶領港大國際化外，亦會好注重學生嘅品德，會鼓勵學生做多啲社會服務，希望可以教好學生。
咁遇着陳巧文呢啲咁激進嘅學生係咪好頭痛？錢大康話學校支持學生關心時事，參加社會運動係冇問題，大前提係要遵守法律，以佢自己為例，佢喺美國讀書嘅時候，都參加過反越戰嘅社會運動，仲話學生就好似自己嘅仔女，發生乜嘢事學校都會盡力幫。雖然講到咁，但佢點都唔肯評論陳巧文係咪過激。