高鐵撥款爭議引發警民衝突後，煲呔曾政府開口埋口都話關注同青年人溝通，事後財爺鬍鬚曾係咁意喺某青年講座「偶遇」一個反高鐵嘅「80後」，運輸及房屋局局長鄭汝樺仲離譜，竟然去咗個嚴密布防嘅工程界「80後」政改研討會，認真九唔搭八。
尋日鬍鬚曾又再出動，但今次又唔係搵「80後」，而係搵「90後」，仲好揀唔揀，偏偏揀去佢「真兄弟」煲呔曾母校、香港華仁書院，講點樣制訂預算案。
佢話會按照務實穩定、發展根基同社會責任等三個基本原則嚟制訂預算案，呢啲講嚟講去三幅被嘅嘢，但原來去到最尾先係戲肉。
佢話呢三個基本原則都可以應用喺大家日常理財方面，首先就係同學喺日常購物消費時，可以考慮採取務實穩定嘅原則，量入為出，避免買啲冇需要嘅嘢。咁即係叫班學生哥慳啲使啦！
事有蹊蹺喎！早前煲呔曾喺工展會消費大縮水，事後仲辯稱話唔使托市，跟住又重施狼來了故技，暗示唔會派糖，鬍鬚曾依家叫煲呔曾啲師弟慳啲使，咪即係曲線幫煲呔曾平反、撐大佬啫！