民主阿婆不但向班學生死撐總辭，喺開場時仲狂抽水，狠批煲呔曾嘅「跛腳鴨」政府，話政府透明度唔高之餘，又漠視民意，完全唔掂。跟住佢愈講愈興起，話香港之所以有今時今日嘅法治同自由，完全要歸功於歷史上嘅一個「意外」，令香港有機會畀英國管治咁話。香港已經回歸咗十二年，但好明顯，民主阿婆仍然好沉醉喺佢嘅港英夢當中，咁多年都未瞓醒。

落咗一輪麻醉藥諗住有效？好在時下嘅學生都有自己嘅獨立思想，有一個「90後」嘅學生就即場踢爆民主阿婆，質問佢點解當年仲喺港英政府做高官嘅時候，唔幫香港推動民主，依家回歸咗、佢又退埋休，先出嚟多多聲氣搞搞震？

帶人遊花園 邏輯混亂

民主阿婆聽到條問題當堂嚇呆咗，之後就開始帶大家遊花園，話民主唔可以第一日就推行，又由香港五十年代嘅歷史講起，話當年有大批大陸難民湧入香港，政府需要處理房屋同教育問題呢啲當務之急先喎，而依家香港發展成熟嘞，先係爭取民主嘅時候，總之就將自己嘅責任推得一乾二淨。

不過佢最後都認衰，話當年港英政府可能可以做多啲嘢，但又死撐發展民主要「循序漸進」，總之佢嘅邏輯就混亂到難以理解。

民主阿婆仲話喺香港做特首唔單止要高調，兼要隨時推行一啲違背自己原則嘅政策，所以自己從來都冇諗過要去選喎，又話冇後悔自己提早退休嘅決定添。講就講得好聽，但俗語有云「吃不到的葡萄是酸的」，呢句說話放喺民主阿婆身上就最啱嘞。