小白觀點：好在冇索K冇玩剝衫

啲人成日鬧煲呔曾唔夠親民，真係怪錯咗佢呀，呢嗱，早前就有班「80後」入咗去禮賓府玩咗成日，都不知幾Happy。有人話啲小朋友唔夠尊重，我就話佢哋好乖就真，只不過BBQ大魚大肉，又冇人喺裏面索K，一條龍玩「包剪揼剝衫遊戲」，總好過畀日本攝影大師篠山紀信入去影AV女優裸照，出本「Nude Government House」啦。

好多人都想知點至可以入去玩，當然最緊要識得裏面嘅「鬼卒」啦，不過大家得閒都可以試吓打2878 3300去禮賓府或傳真去2509 0577，再唔係就send個電郵去ceo@ceo.gov.hk問問，如果Book到邊日入去玩鋪勁嘅，千祈唔好唔記得預埋我嗰份，我出紅酒海鮮又點話吖。

網友觀點...X）...

[　小　黑　]

煲呔曾嘅家務員搞活動係有一手，做家務員簡直嘥料，煲呔曾應該升佢去旅發局做揸Fit人。

[　小　魚　]

見佢哋玩得幾咁開心呀，仲可以近距離同錦鯉玩遊戲添，平時都只係喺電視機見到，原來可以入去玩㗎喎！

[　小　炳　]

班「80後」真係靠唔住，Happy完仲周圍唱，煲呔曾以後見到啲「80後」都怕怕。

[　老　七　]

車公支籤真係幾靈，特府內有煲呔曾呢隻家鬼，禮賓府內又有家鬼，鬼打鬼，哈！

網址：www.sunsiupak.blogspot.com

阿豪觀點：戥深水埗小朋友唔抵

多得班調皮「80後」識得禮賓府員工，入到去大玩特玩，大家至知禮賓府原來可以BBQ。如果禮賓府全年開放畀市民入去玩就好喇！

最唔抵係班深水埗嘅小朋友。點解咁講？原來煲呔曾舊年聖誕節招呼班小朋友去禮賓府玩，但係節目只係唱吓聖詩、派吓禮物一類嘅傳統節目。佢哋依家睇到呢班「80後」哥哥姐姐原來可以咁玩法，肯定會好羨慕。

至於一年得兩次機會入去睇杜鵑花嘅你同我，就更加係恨都冇用。小白兄建議send電郵畀煲呔曾叫佢開放禮賓府，其實豪伯日前已經喺煲呔曾個博客留言，點知只係得到自動回覆話已經收到電郵，你話係咪嘥鬼氣吖！

網友觀點...X）...

[　哨牙叔叔　]

好彩只係貪玩嘅年輕人，假如係嗰啲偏激嘅「80後」走咗入去，賴死唔走要求乜要求物，咁就……

[　王老伯　]

我今年嘅生日願望，係想喺禮賓府搞個生日會，同煲呔曾一齊BBQ。

[　尖頭文　]

禮賓府員工點會只得家務員一人？佢哋會唔會同流合污齊齊呃煲呔曾？仲有冇其他衰嘢做咗而煲呔曾未知？

[　大聲啲　]

肯定唔係第一次，咁易入到去玩，都算係幾無王管！

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

明日主題

癲價公屋