正所謂「公院護士荒，一嶽眼光光」。面對護士不斷流失，食物及衞生局局長周一嶽束手無策，只好故作鎮定咁講，近年增聘嘅護士人手多於流失，過去兩年護士總人數增加咗三百幾，加上當局已經重開護士學校，各間大專亦加收護士學生，未來有大批新血投入服務。

叮！周一嶽講到有備無患咁，查實不過係玩數字遊戲，自欺欺人。冇錯，護士總人數係增加咗啲啲，但係醫療服務嘅需求增長遠遠高過呢個水平，正如華員會護士分會話齋，醫管局近年有新醫院落成，又增加新服務，護士根本供不應求。再講喇，醫管局請嘅主要係新手，而流失嘅大部分係資深護士，新丁代老手，服務水準大倒退，近年公立醫院事故長爆長有，唔通真係同資深護士不斷流失無關？

至於所謂增加新血，亦係遠水難救近火。當年醫管局一葉障目，閂晒護士學校，搞到護士幾乎斷層，直至前年，醫管局先如夢初醒，重開三間護士學校。可惜緩不濟急，家陣護士短缺已達警戒級別，培訓得嚟，蛇都死啦！

而更大嘅問題係，培訓新血係一回事，新血會唔會流入公立醫院又係另一回事。正如有資深護士指出，近年公立醫院護士士氣低落，同新入職護士喺頭三年合約期間不斷調職有關，呢頭啱啱熟悉工作環境，嗰頭又要調去其他專科由頭學過，令佢哋難以發展專業，工作難有滿足感同歸屬感，所以紛紛轉投私家醫院。可見公院護士短缺唔只因為新血唔夠，仲係因為管理不善趕走新人，醫管局高層係咪應該檢討吓呢？

公院護士大逃亡，人手不足、工作壓力大係一個原因，資源少、待遇差係另一個原因。其實，醫管局資源唔算少，每年三百幾億，如果分配好啲，足夠有餘喇，弊就弊在管理架構疊床架屋，嘥埋晒啲無謂嘅行政開支。就好似醫管局轄下嘅醫院聯網咁，根本就係法國大餐，多舊魚，所有病人嘅病歷早就電子化啦，公立醫院訊息互通，仲有冇需要設醫院聯網實行分區管理吖？只要取消分區管理，將行政資源轉投前線，咪可以請多啲人手，紓緩護士不足嘅問題咯！