尋日開幕禮完成後，主辦單位為一眾主禮嘉賓安排咗個導賞團，帶佢哋參觀吓唔同參展商，范太一路左顧右盼，仲忽然彈咗句：「最緊要買嘢呀，大佬！」導賞團啱啱結束，范太已經一個箭步衝去海味舖，原來佢嘅目標係花膠，仲用咗二千八百蚊買咗十幾塊每塊大過手板嘅花膠。

之後佢再戰乾貨攤，用四百二十蚊買咗兩樽地寶粉、六條有「一夜情」之稱嘅「鹹鮮魚」同埋一大包蝦乾。范太仲教我哋，平時煮湯麵時，可以落地寶粉代替雞粉，味道會更鮮；又話佢平時會將一包蝦乾放喺枱頭，睇書時用茶送嚟食就最正喎！不過，范太都話，其實佢煮嘢食並唔叻，尋日買嘅材料都係聽奶奶「指示」。