社會最近對喺反高鐵一役成名嘅「80後」議論紛紛，早排中大校長提名人沈祖堯撐「80後」唔算激，理工大學校長唐偉章尋日都喺電台節目中講到佢對「80後」嘅觀點，話部分「80後」可能不滿現狀，言語行動有時可能過分偏激，但係佢哋敢於表達、勇於面對卻係成功嘅要素，有彈又有讚。不過，唐校長真正睇好嘅，可能係未來嘅大學生，仲希望呢批「90後」青年做一個「講求實效嘅夢想家」添。
唐校長尋日話，大學生及年輕一代係社會棟樑，有點樣嘅年輕人，就有點樣嘅社會。近排「80後」成為焦點，可能有啲人對現狀不滿，或者唔理解政府嘅決定，唔認同社會制度，甚至未能充分掌握全部事實等，但唐校長相信佢哋係有理想、有盼望、願意承擔嘅年輕人，所以呼籲多啲包容忍耐「80後」，以對話代替批評。
佢跟住講到自己對培訓大學生嘅要求，話大學應該培養學生兩文三語、有專業知識同技能外，仲要令佢哋有國際視野、良好情緒智商同逆境智商、懂得解決問題等，呢啲都係時下好多年輕人不足嘅地方，唐校長希望大學生做到上述條件，似乎佢鍾意「90後」多啲噃！