華懋集團新掌舵人龔仁心喜事連連，除咗喺家姐龔如心千億爭產案中贏咗個勢外，上月中又娶新抱，細仔龔皓結婚成家立室。高高興興做完老爺後，有接近龔仁心嘅消息人士又透露，佢嗰位甚少公開曝光嘅大仔龔颷，將獲增選為四川省政協委員，喺政壇上升呢。龔家咁多好消息，真係可喜可賀！
四川省政協第十屆三次會議今日起一連五日喺四川省會成都舉行，會議有九項主要議程，其中一項就係補選政協委員，據講龔仁心愛兒龔颷都喺名單上，如無意外將順利當選。其實四川省政協都有唔少嚟自香港嘅特邀人士，其中包括信和置業主席黃志祥嘅公子黃永光、華人置業董事劉鳴煒、工業總會副主席劉展灝以及被傳為寶蓮寺接班人之一嘅釋健釗等，個個都係有來頭。近年嚟，龔仁心喺親中圈子相當活躍，去年中聯辦嘅新春酒會，佢都有出現。