政圈有好多粵曲愛好者，民政事務局副局長許曉暉（Florence）尋晚就同馬會主席陳祖澤（John）粉墨登場，為香港唐氏綜合症協會嘅慈善粵曲欣賞會作表演嘉賓。有十幾年唱功嘅阿John表現毋庸置疑，但初試啼聲嘅Florence亦唱得有板有眼，博得全場掌聲。學曲只有半年嘅Florence話，因為工作關係，學曲經常要遲到早退，好彩天資搭夠。
表演喺北角新光戲院舉行，食物及衞生局副局長梁卓偉、財經事務及庫務局副局長梁鳳儀同政制及內地事務局副局長黃靜文都有去撐場，黃靜文仲去後台恭賀一番。
Florence話當初喺機緣巧合下識咗任白嘅徒弟江雪鷺，於是拜師學藝。尋晚佢同師姐一齊合演《劍合釵圓》，Florence演繹霍小玉，師姐就做李十郎，兩人合作無間，而Florence穿着嘅一襲晚裝，更加令現場觀眾眼前一亮。成個慈善晚會共籌得四十萬元，其中十萬元由鄉議局主席劉皇發女婿余漢坤代表信和置業捐出。