本文重點
政圈因為五區辭職刀來劍往，尋日基本法委員會委員譚惠珠出席一個電台節目時，翻出六、七年前時任富貴黨主席嘅田北俊倒戈反對《基本法》廿三條立法嘅舊帳，話田少「奉旨唔聽話嘅」，根本唔算係建制派。此話一出，田少梗係要回應，佢話富貴黨唔係「盲目嘅保皇黨」，過往政府提出嘅施政報告、財政預算案，以至絕大部分嘅政策、法案同撥款建議，富貴黨同佢本人都喺立法會投咗贊成票，藉此交心。
其實，富貴黨尋晚已率先宣布唔派人參加補選，表態唔支持呢場所謂嘅「公投」或「起義」，無論呢個係北京嘅指示定係建制派內部協調嘅結果，都證明該黨絕非「唔聽話」噃。
連建仔都得罪埋
譚惠珠尋日除咗翻田少舊帳，連佢所屬嘅建仔都得罪埋，事關同佢一齊喺電台鬥嘴嘅公文袋余若薇話，建仔當年都曾經支持○七○八普選，質疑建制派都有出格嘅往績，點知譚惠珠一句就頂返去：「民建聯當年唔識《基本法》。」咁講即係建仔當時唔識，事後先學識？可惜譚惠珠唔肯再進一步解釋。