公社兩黨搞嘅五區辭職計劃愈嚟愈離譜，自從佢哋打出「公投」、「起義」嘅口號後，政界日日都有人批評，公社兩黨就由變身活動大旗手嘅余若薇嚟解畫，佢尋日話「起義」唔係叫人造反，而係「大家一齊，動作起來，起來爭取公義」。咁都得？咁小學生可唔可以照辦煮碗，將「作弊」解為大家一齊作文互助，絕無弊處呢？
余若薇尋日出席一個電台節目時，被問到「起義」惹嚟好多反感，佢就即場顯示自己嘅中文水平，作咗呢個解釋出嚟。不過，起義可解作「起來爭取公義」，都真係笑死人，或者，余若薇當其他人唔識中文，又或者佢哋呢次嘅活動唔止係五區辭職，仲有全港再學中文、舊詞新義等啩！
不過，佢哋咁樣亂教中文，全港中小學生就弊喇，中文老師更加多得佢哋唔少！