本文重點
高鐵香港段撥款演變成衝擊事件，運輸及房屋局局長鄭汝樺（Eva）同建制派議員事後被困立法會大樓近六小時，事件令好多人患上「高鐵恐懼症」。尋日Eva出席工程界社促會政改論壇，諗住趁呢個機會同一班「80後」同「90後」嘅工程界學生溝通，工程界早排因為高鐵爭拗爆出「踩場」等事件，唔知係主辦單位猶有餘悸，定係Eva變成惹火高官，尋日論壇場地保安嚴密，Eva好似喺銅牆鐵壁入面同啲學生交流咁。區區一個論壇都咁大陣仗，香港真係唔多自由噃！
呢個由工程界社促會搞嘅政改論壇喺銅鑼灣怡東酒店舉行，所有人士入場前都要經過嚴格登記，仲要確認身份，社促會高級副主席嚴建平會前介紹論壇流程時，更重提早前召開撐高鐵記者會時遇到不速之客踩場，所以特別要求酒店加強保安，並警告任何人在場喧嘩會被趕出場。
曾幫工程系同學做「槍手」
佢哋對踩場一事記憶猶新，或者同Eva有關。Eva係負責運輸嘅官員，尋日明明係政改論壇，議題應該係政改，但佢卻抓緊機會同現場嘅「80後」甚至「90後」學生溝通，難怪會方大為緊張啦，事關「80後」青年圍堵立法會時，最唔滿意就係Eva冇出去見佢哋，尋日有咁多學生哥在場，如果有人又聞風踩場，Eva分分鐘又畀人圍過，所以主辦單位變咗驚弓之鳥，搏命加強戒備。
有呢個媲美一級戒備嘅環境，Eva同學生嘅溝通梗係暢所欲言啦。會前佢同青年對話時，自爆當年入住港大宿舍期間，遇到唔少工程系同學，間中會充當「槍手」幫同學撰寫或修改文章，藉此拉近同工程系學生嘅距離，仲話理科學生計數叻，但講到寫文章就唔夠文科生咁好嘞！