機電署尋日終於搵業界人士開咗個公聽會。仲以為有番啲眉目添，點知又係得個吉。會上透露中石化已經完成旗下七個專用加氣站嘅清缸工作，但又唔肯保證站內嘅石油氣安全可靠。本來業界最關心嘅係石油氣化驗結果，機電署就話，最快下個月先至可以向外公布。咁即係話，個會乜嘢問題都冇解決，開咗等於冇開，難怪有業界人士批評機電署做騷做上癮。

最令班的士司機頂唔順嘅係，機電署扮晒嘢，話的士死火係好複雜嘅問題，冇足夠證據唔可以倉促公布。乜嘢叫做好複雜？如果一眼就睇得穿嘅，就唔使搵政府查啦。乜嘢叫做倉促公布呀？人命關天嘅大事，查咗三個禮拜，仲唔應該有結果咩？

叮佢個鎯鎯，呢單嘢唔通仲複雜得過追捕鏹水狂徒，人哋警方假假地都捉咗個「翻版鏹魔」。警方不嬲畀人哋話係無能㗎啦，勢估唔到，機電署仲渣得多多聲，淨係識交白卷都未算，仲要做騷搵人笨。

有人話，機電署其實係將簡單問題複雜化，講得一啲都冇錯。署方一個禮拜前就抽取中石化嘅石油氣樣本，分別送去惠州同埋德國化驗。內地嘅化驗已經完成，但係署方要等埋德國方面嘅報告，最快下月初至一齊公布。

咁就奇嘞，既然內地嘅化驗有咗結果，點解唔可以先公布呀？真想問吓機電署署長陳鴻祥，唔通真係外國嘅化驗先至可信？如果信唔過內地化驗結果，當初點解要攞畀佢哋化驗？最弊嘅係，署方唔公布化驗結果，又唔肯保證石油氣安全可靠，令人懷疑內中有鬼，唔通啲石油氣真係有問題？正如班司機大佬話齋，叫人哋點夠膽入氣呀？

如果明知啲石油氣唔掂，又唔講畀人哋聽，咁即係靠害啫。大家唔好唔記得噃，的士死火嘅事一直都未停止過，最近日日都有十幾架車喺半路跪低。大佬，呢家嘢唔係講笑㗎，架的士喺高速公路行行吓死咗火，後面嘅車煞唔住掣衝上嚟，分分鐘車毀人亡。

唔怪之得網上有人向駕駛人士教授保命法：如果見到前面有的士，要盡量離佢遠啲，否則死咗都唔知點死嘅。仲係嗰句老話，政府靠得住，豬乸會上樹，大家都係自求多福啦。叮！