森記位於香港仔湖北街，雖然只得七年歷史，但勝在味道正宗加上二十四小時營業，好多名人都係佢哋嘅擁躉。好似近排減肥復出公仔箱嘅「三嫂」戚美珍、袁潔瑩同埋蘇志威夫婦等，都成日去醫肚。

老闆坤哥話佢哋最受歡迎嘅係魚蛋、魚片同魚片頭，由於係二十四小時營業，所以每日都賣成六、七十斤咁多㗎！佢哋特色係揀選靚黃鱔自己製造，質素有保證。坤哥講到興起，又盛讚佢哋嘅牛腩、牛筋同牛雜都有好多捧場客。佢話牛腩要好味，最緊要用靚嘅部位，至於佢哋啲湯底係用魚、豬骨同雞熬十粒鐘，真材實料，絕冇欺場，所以勁受歡迎。坤哥用咗七年時間就有咁多擁躉，實有佢嘅秘訣啦！