立法會今日開大會，旅遊界嘅議員謝偉俊（阿Paul）今日有個動議辯論，要求停建添馬艦政府總部。不過，阿Paul出師不利，畀煲呔曾使橫手干預，事關煲呔曾曾經搵人游說佢放棄提出有關動議，或者改過個動議字眼，總之唔想見到「停建添馬艦」呢幾隻字。
阿Paul最後當然冇睬佢，但其後專業會議嘅何鍾泰就提咗一項修訂，刪咗動議內嘅「停建添馬艦」用詞，唔知係咪煲呔曾搞唔掂阿Paul，要搵何鍾泰出手呢？其實，呢類動議根本冇法律約束力，即使通過，政府亦無需要跟住做，更何況根本好可能通過唔到？煲呔曾咁都要使橫手阻撓，證明佢真係當咗添馬艦總部係佢私人王宮，唔想工程有任何阻滯或延誤，令佢可以喺二○一二年卸任前趕得切搬入去。
講起煲呔曾嘅阻撓，阿Paul又爆上禮拜財委會審議高鐵撥款時，佢大戰班拉布泛民議員，不斷收到建制派議員紙仔，勸佢封嘴，以免會議愈拖愈長，最後連煲呔曾都透過特首辦主任譚志源叫佢咪再糾纏落去，但佢一樣不為所動，繼續開火。佢之前已經話，經過一年議會新丁實習後，自己會回復超人本色，想講乜就講乜，鍾意鬧邊個就鬧邊個，乜人都唔使畀面。