一向牙擦嘅冠軍練馬師「食力簡」簡炳墀係馬場常客，最近被傳患上胃癌。尋日幾位新界重量級鄉紳接受查詢時，冇人話聽過呢個傳聞，事主更加中氣十足咁粉碎謠言：「嘥氣，無中生有，我老虎都打死幾隻呀！」
咁邊個咁大整蠱呢？食力簡話，呢啲謠言嚟自網上，經常傳佢呢樣傳佢嗰樣，過去曾經傳佢「溝女」同「呃錢」，點知最近仲傳佢患上中期胃癌，佢好無奈咁話：「咁樣做人心地唔好囉，我間中傷風咳就有，又冇去睇過醫生，點解會傳到咁呢？」
簡Sir又話依家享受退休生活不知幾爽，揸住架「Rolls Royce（勞斯萊斯）」四圍去，除咗入馬場巡場外，一得閒就會約埋三五知己去打高爾夫球，上禮拜先喺粉嶺同清水灣高球會贏波，早前仲同個仔簡永輝去澳門玩，不知幾開心。