本文重點
每對情侶都有自己嘅浪漫聖地，立法會議員、資訊科技界議員譚偉豪（IT豪），前日缺席建制派議員嘅飯盒會，同太太梅嘉慧特登搭船入長洲玩，因為當日係佢哋結婚十八周年紀念日，而長洲係佢哋嘅定情地，所以兩夫婦專登喺特別嘅日子去特別嘅地方回味吓。
有情食砵仔糕飽
IT豪話佢哋當年兩情相悅後，並冇即時話畀其他朋友知，到戀情穩定，一次大班人去長洲玩嘅時候，先將戀情公開。結婚十八年，IT豪話好似冇再帶過太太重遊舊地，於是趁今次周年紀念，撇低囝囝Arthur過番一日二人世界，由朝玩到晚，行完山又漫步沙灘。IT豪嘅如意算盤係同太太撐枱腳食海鮮，結果計劃告吹，改為食砵仔糕補數。正所謂「有情飲水飽」，有情食砵仔糕一樣咁浪漫。