迪士尼落戶香港後，不利消息頻傳，政府嘅表現都畀人軟弱之感。尋日，迪士尼因應港府同佢哋嘅新協議，公布○八至○九年度帳目，終於好似小學生咁攤開成績表畀家長睇，商務及經濟發展局局長劉吳惠蘭（Rita）一睇張成績表就板起面孔，明言「唔滿意」，有人形容政府嘅態度好似由以前嘅委屈新抱升級為惡家長咁，Rita嘅訓話更有打手板小懲大戒嘅味道。
政府企硬，有揣測話係因為迪士尼集團已決定喺上海興建新園，如果港府再唔強硬啲、逼佢哋改善業績，呢盤生意注定要蝕本；亦有人話舊年政府同迪士尼磋商擴建方案時，加入咗啲辣嘅條款，包括增加透明度，所以今次公眾可以監察迪士尼嘅帳目。點都好，政府可以用大股東嘅身份鬧吓迪士尼、逼佢哋喺營運上做多啲改良，總算係一件好事嚟嘅。
口痕友又話，由港府「賣大包」吸引米奇老鼠嚟香港開始，香港一直畀人鍊住，今次Rita高調批評迪士尼嘅表現，又搬出大股東嘅身份嚟喝令對方提高績效，真係少見嘅強勢。不過，政府揼咗咁多公帑落去，鬧人之餘都要諗吓配套辦法，改善迪士尼嘅業績至得。