本文重點
旅發局主席人選近期傳出陣陣煙幕，由於政府至今未宣布新安排，坊間先後傳出現任主席田北俊冇得玩、經濟動力林健鋒（Jeffrey）同海洋公園主席盛智文係熱門接棒人嘅消息。不過，呢啲訊息不乏煙幕成分，當事人之一嘅扮嘢文更話自己冇收過政府通知。有旅遊界中人話，煲呔曾小氣、任人唯親，想換咗田少唔係冇可能，但扮嘢文接任旅發局嘅話，等於政府一再違規，呢個委任機會真係唔高。
容偉雄傳做旅遊事務專員
呢場主席之爭嘅煙幕，政圈人士都鎖定係有心人放嘅，目的亦唔使畫公仔畫出腸。之但係，扮嘢文舊年獲委任再做海洋公園主席時，政府已經打破其中一項六六規定（即委任公職任期不得多過六年），所以當時講到明係因為海洋公園搞擴建，等扮嘢文繼續跟番擴展大計。家下如果再委任佢做旅發局主席，等於一再違規，何況呢兩個位本身有潛在利益衝突，所以扮嘢文接任旅發局主席嘅機會真係唔多高。
另一個傳聞熱門係Jeffrey，係人都知，經濟動力好想喺政圈搶佔多啲地盤，而佢哋又同煲呔曾行得好埋，獲投桃報李都有可能。不過，如果政府棄田少而委任Jeffrey，咁煲呔曾政府同富貴黨嘅關係必定更受影響，旅遊界嘅立法會議員謝偉俊都話咁樣「核突」，所以有意見認為，政府即使捨田少而委任其他人，都未必係Jeffrey。兩個煙幕熱門都唔係真命天子，呢次政府吊高嚟賣真係玩殘好多人。
另外，旅遊界仲有一個備受關注嘅旅遊事務專員吉位，現任運輸及房屋局副秘書長容偉雄據講係內定人選，佢喺運房局專責高鐵事務，調職一事亦因為高鐵爭拗而暫緩。有旅遊界中人批評政府推銷高鐵時提都唔提吓對跨境旅遊嘅正面作用，容偉雄如果真係接任旅遊事務專員，就要好好補吓旅遊堂至得喇。