小白觀點：難怪上街尋找刺激

有調查發現，好多「80後」打工仔做得好唔開心喎。呢啲咁嘅調查真係無聊到極，試問返工可唔可以瞓喺老闆房門口軟禁佢吖？返工可唔可以反轉同事張工作枱吖？返工又可唔可以爆粗挑釁上司吖？唔得吖嘛，咪就係囉，難怪佢哋工都唔返，要上街尋找刺激啦。

可能好多老餅對「80後」睇唔過眼，覺得成個世界好似欠咗佢哋咁。但我又有啲同情佢哋，「80後」實在生不逢時嘅，一樣都係大學畢業，對上嘅「70後」主管不過大佢幾年啫，因乜事佢係官，自己係兵呢？除非平機會新官上任，整條「年代歧視條例」規定「80後」以後同「70後」同工同酬啦，否則佢哋點都唔會服氣。

網友觀點……

失業漢

任何年紀嘅打工仔都會有唔開心o架啦，應該同年齡冇關係啩。

工廠男工

呢個係打工仔同老闆嘅深層次矛盾，真係一言難盡！！

調查員

調查埋其他年齡作比較至有意義，呢份調查都係趁熱鬧炒作居多！！

李老闆

「80後」做嘢唔係路？完全荒謬，你睇佢哋反高鐵嘅表現，瞓晒身絕埋食，已值得加人工啦！

網址：www.sunsiupak.blogspot.com

阿豪觀點：夠薑就炒老闆魷魚

有調查發現，「80後」打工仔有一成做得唔開心，同時亦有好多老闆猛彈「80後」做嘢唔係路。我就冇乜興趣理邊個啱邊個唔啱嘞，只係好想知道，點解冇人走去問吓啲「70後」、「60後」做嘢開唔開心嘅？做乜依家好似成個社會圍住班「80後」後生仔團團轉咁樣o架？

講真，做埋啲咁嘅調查真係唔知想為乜，打工仔做嘢唔開心喎，你唔好去調查吓有幾多饑民覺得肚餓？

依家好多人都話班「80後」激進，係咪應該有人進行一項跟進調查，睇吓有幾多打工打得唔開心嘅「80後」索性炒老闆魷魚，自己闖一番天地呢？如果佢哋真係咁夠薑嘅話，豪伯就真係讚佢哋型喇！

網友觀點……

憤青

豪伯講得啱，忽然間「80後」畀人擺上枱作研究對象，係咪真係玩大咗呢？

超級巨肺

大家成日針對「80後」，其實「90後」有援交同吸毒嘅問題，咪仲嚴重，每個年代都有問題o架啦。

love_mom

唱吓反調先，我係「80後」，我工作好開心喎！

i_am_orange

都唔關「80後」事，依家咁嘅市道，有邊個打工仔會快樂o架？？

網址：www.lukchiho.blogspot.com