可惜啊，今年可能見唔到呢種盛況咯，事關旺角大球場包括停車場舊年開始重建，預計出年先完成，換言之，花農今年唔可以喺停車場賣年花。

本來呢，停車場裝修唔用得，可以換個地方擺檔嘅啫，可惜，花卉職工總會舊年九月已經代表花農去信民政事務總署，要求喺旺角花墟一帶另外安排地方畀佢哋賣花，並且提出三個建議，包括花墟道苗圃、花園街一段行車路，或者太子道西一段行車路。之但係，民政署班官僚一於闊佬懶理，拖吓拖吓，拖到家陣都未有定案。眼見唔夠一個月就到農曆年，業界人士好無奈咁話：「署方淨係識得否決我哋嘅建議，佢哋一啲反建議都無，非常過分！」

花農無位擺檔，花墟黯然失色，市民買花少咗選擇不在話下，最慘係影響花農生計。有位花農話，每年喺花市嘅收入約有七至八萬蚊，佔全年收入一半，如果民政署唔安排地方畀佢哋賣花，可能連食飯都成問題。

叮！今時今日，基層市民搵食已經愈嚟愈艱難，政府唔去諗計搞旺個市，反而搞到花農無啖好食。太一叮思疑，民政署班廢官可能學咗前蜀後主王衍，雖然新年未到，佢哋已經開定支紅酒，個個飲到醉醺醺咁，那邊走，這邊走，莫厭金杯酒，自然懶理花農死活。

花農警告，如果政府再唔正視問題，佢哋唔排除用貨櫃車阻塞花墟嘅主要通道，齊齊瞓街抗議，再無辦法嘅話，佢哋仲會喺花墟一帶走鬼賣花。唉，呢啲咪叫做官逼民反咯！

叮！搵個地方畀花農擺檔，本來只係一件好簡單嘅事，民政署班官僚連咁小嘅事都推三阻四，簡直不可理喻。近年來，因為成班高官淨係識得匿喺冷氣房度，不知民心向背，不識民間疾苦，搞到任何小事都化為大事，成個社會紛紛擾擾。呢，高鐵工程已經爭拗不止，家陣連花農賣花都可能搞個官民衝突出嚟，再咁落去，香港想唔沉淪都幾難！