立法會議員不乏學識俱佳之輩，但議員辯論時卻不時讀錯字，早前建仔新丁陳克勤將「褫奪」讀成「遞奪」，犯咗有邊讀邊嘅錯誤，結果被身為前輩嘅立法會主席喺議事廳即時話唔啱，令佢非常尷尬。尋日財委會會議上，主席劉慧卿亦犯咗同樣錯誤，大大聲唔止一次叫大家唔好再「劍拔弓張」，其實，佢應該係想講「劍拔弩張」，但就將弩（音為魯）有邊讀邊，不過，啲議員冇人得閒糾正佢。
卿姐喺尋日會議尾聲已現疲態，EQ開始下降，面對泛民主派同建制派鬧交，更皮質醇上升，結果句「劍拔弓張」成日喺電視播出。到投票前最後一輪發言，卿姐更加思緒混亂，原本叫社福界張國柱發言，但叫咗「張國麟」，同李國麟撈亂咗，事後佢都忍唔住擰擰頭，盡現心力交瘁嘅一面。