官場有好多最佳拍檔，教育局局長孫明揚同滿面鬍鬚嘅新聞秘書李崇明（Timothy）就係一例，無論孫公負責房屋、政制定係教育，Timothy都同佢形影不離。不過，尋日佢哋卒之要分開嘞，事關Timothy夠鐘退休，孫公為咗送別好拍檔，前晚喺中環德己立街港大同學會會所擺兩圍餞別。
Timothy喺政府新聞處工作逾三十年，同孫公嘅緣起要數到區域市政局年代，追隨孫公十幾二十年，兩人關係深厚，孫公唔捨得呢個下屬好容易理解。前晚嘅餞別宴有唔少教育局官員，孫公太太鍾小芬同之前代表孫公到英國出席教育部長會議嘅副局長陳維安、政治助理楊哲安都有出席，陳維安仲特別搭早一班飛機趕回港送別Timothy添！
