政商界有好多潮州架己冷，官場勢力雖然唔大，最近卻出咗個推廣家鄉不遺餘力嘅前高官，佢就係有黑英之稱嘅前天文台台長林超英嘞，尋日佢專登為浸大持續教育學院嘅「潮汕語言文化探索」講座做嘉賓，介紹潮州嘅歷史同飲食文化。原來黑英祖籍潮州，十九歲前喺屋企都係同嫲嫲講潮州話嘅，佢話人愈老鄉情愈濃，對自己嘅家鄉好奇心愈嚟愈重。
一直研究天文地理嘅黑英話，潮州一帶畀群山包圍，河都唔多條，地理位置喺中國嚟講都算係非常之差，不過，正正因為地理位置受到限制，潮州人因而有捱得同刻苦嘅特性。講到呢度，自認「潮人」嘅黑英都忍唔住笑一笑，話自己雖然係「潮」人，但就唔係咁捱得喎。
佢仲唱好潮州食品，話最鍾意太太為佢整嘅蠔烙，即係蠔餅。一向嘴刁嘅另一個醫界「潮人」高永文都話鍾意潮州菜，心頭好係媽媽整嘅「鹹魷魚豬肉餅」，可惜佢媽媽過咗身後就冇機會再食。為咗追憶媽媽嘅名菜，佢曾經走遍港九新界，搵嗰種特別嘅鹹魚，再將呢味餸嘅烹調方法傳授畀一間相熟嘅酒樓，等佢哋炮製相同嘅餸，自己幾時想食都可以食到，最好係可以將呢味佳餚傳揚開去，等其他「潮人」或市民都可以試吓。