新界王劉皇發前晚假尖沙咀半島酒店嘉麟樓設壽宴，當晚所有仔女同孫仔孫女三代同堂齊向發叔祝壽，仲有好多政商名人到賀添。發叔生日，太太送乜禮物呀？發嬸話客家人唔興送禮物，只祝願發叔快樂又健康！尋晚高鐵撥款表決後，大班議員被困喺立法會大樓內，發叔同經濟動力嘅議員聚埋一齊傾偈，仲攞自己嘅年齡講笑，話今年只得三十二歲，經濟動力梁劉柔芬就話佢只得二十八歲！
壽宴當晚到賀嘅官員包括發展局局長林鄭月娥、民政事務總署署長陳甘美華、前民政事務局常秘「媽打」李麗娟、恒基地產副主席李家誠等。其實呢個禮拜五（二十二號）先至係發叔正日生日，但發叔諗住正日清心寡欲去志蓮淨苑食齋，所以家人提早一個禮拜為佢慶祝，但遇啱立法會審議廣深港高鐵撥款，令發叔心掛掛。
雖然發嬸話客家人唔興送禮，但佢個契女就玩踢爆，話發叔計劃送九龍塘一幅幾萬呎嘅地皮畀太太做禮，發嬸急忙澄清話：「仲睇緊未買o架，睇啱可能用嚟起樓，可能老公想我做地產經紀啩！」發嬸講嗰陣甜絲絲、冧到痹，睇怕笪地應該袋袋平安啦。一般老婆鍾意老公多啲陪自己，但發嬸反而希望發叔繼續服務市民，等佢多啲自由時間喎。