兩辦開聲 議員放膽反擊

立法會尋日舉行高鐵香港工程撥款嘅第四日審議會議，泛民繼續拉布，建制派議員除咗以沉默應付外，都冇晒辦法。陣營中出聲最多嗰個係代表旅遊界嘅阿Paul謝偉俊，佢幾度同社民連大舊、「長毛」梁國雄過招，個會開到下晝，好多議員都謝晒，又睇唔到幾時先係拉布戰黑暗隧道嘅曙光，阿Paul忽發奇想，向主席劉慧卿提出要求押後審議撥款四個禮拜，當時議事廳好多人都不免苦笑。

阿Paul話，高鐵爭議愈演愈烈，再傾落去會惹嚟更大嘅紛爭，建議將撥款案押後四個禮拜，等各界充分討論後至表決。點解四個禮拜就夠呢？到時係農曆新年假期噃！心水清嘅人話，公社兩黨話明今個月二十七號啟動辭職，四個禮拜後，公社兩黨喺議會內少咗五個人，其中極大可能包括社民連三子黃毓民、大舊、長毛，而且過年要祥和，審議高鐵撥款應該會少啲火藥味。

此語只係反映一啲建制派議員對下個月議會寧靜日子嘅憧憬，建制派議員對五區辭職一度有啲疑慮，擔心令政局會更亂，但喺中央兩個辦公室開聲之後，建制派議員可以放膽參加討論同反擊，同社民連有牙齒印嘅議員更期望議會遲啲會「暢順好多、有效好多」，有議員更嗌政府抓緊未來三個月嘅黃金時間，盡快向立法會提交重要法案。五區辭職原來獲得咁多掌聲，真係始料不及。