小白觀點：人頭豬腦查案太天真

廟街鏹彈事件發生冇幾耐，警方大發神威喺外牆捉到一個人，點知原來係中空寶，真係瘀皮。好嘞，日前警方又再宣布捉到一件，以為今次咁高調，應該十拿九穩破案啦，殊不知今次捉到嘅只係涉及銅鑼灣嗰單，乃係跟風嘅翻版貨。換句話講，真正嘅鏹魔仍然在逃，佢安坐家中睇到呢個場面嘅時候，定會仰天大笑三聲話：「捉到一個鏹魔，仲有千千萬萬個鏹魔！」

不過大家都唔可以怪晒警方嘅，一哥老早講過o架，有啲案係永遠破唔到；有高官仲坦白，大讚呢個鏹魔認真聰明，所以有呢班人頭豬腦喺度查案，再超級嘅電腦都冇用啦，呢單掟鏹案，注定係Cold Case無頭公案都得嘞。

網友觀點...X）...

[　Vickie　]

依家出街都好驚，成日都開住把遮行街，幾冇癮。

[　成　才　]

根本就通街鏹魔，點捉吖，香港人心地唔好，影衰晒。

[　反鏹魔　]

以為鏹魔多數係精神有問題啦，點知捉咗個正正常常嘅，只係為咗貪過癮就害到人哋毀容。

[　神探A君　]

差佬嘅智商頂多捉到呢個笨鏹魔，大家都係小心為妙，旨意差佬就死，都係自保好過！

網址：www.sunsiupak.blogspot.com

阿豪觀點：無牌管有鏹水要收監

好嘢！一天都光晒喇，終於捉到上個月喺銅鑼灣掟鏹水彈嘅疑犯。咦，咪住，警方話佢同其他鏹水彈案冇關喎！吓，咁即係話，原來有好多人模仿鏹魔嘅犯案手法，咁香港究竟仲有幾多個「翻版鏹魔」呢？

睇嚟警方都係好難捉到真正鏹魔。諗嚟諗去，似乎目前最有效嘅方法，都係將腐蝕性液體列作違禁品，任何人士喺未持有牌照下管有，一律都要收監。

豪伯計劃將清水裝入樽裏面，然後推出市面當正係通渠水、鏹水咁賣，當然會美其名話係對人畜無害嘅「安全鏹水」啦！你哋問賣假貨會唔會畀人拉？唔係講笑呀，乜香港政府會監管消費陷阱嘅咩？

網友觀點...X）...

[　大頭成　]

應該嚴懲銅鑼灣鏹魔，等其他人知做鏹魔一定冇好下場！

[　李怒眉　]

以後出街睇怕都要撐住把以防鏹認證物料製造嘅遮囉。

[　牛丸萬　]

捉到一個鏹魔，仲有千千萬萬個，根本防不勝防。

[　四眼佬　]

警方將捉銅鑼灣鏹魔嘅線索公開，各區嘅鏹魔收到料一定會升晒呢啦，想捉佢哋更加難囉！

網址：www.lukchiho.blogspot.com