曾蔭權喺立法會答問大會話，鏹水彈案有「突破發現」，期望其他同類案件亦可以盡快解決。警方尋日帶同銅鑼灣鏹魔疑犯返現場重組案情之後話，相信疑犯當日單獨犯案，懷疑係模仿犯案，暫時冇證據顯示佢同其他投擲腐蝕液體案有關。

油麻地廟街上個禮拜亦發生鏹水彈「空襲」，係一年幾以來本港第八宗同類事件。警方本來話捉到個疑犯，可惜誤中副車。由於鏹水彈案手法相似，狂徒專揀行人密集嘅鬧市作案，好多人都估係同一人所為，諗住警方呢次拉到疑犯，一天都光晒。

叮！依家仲大劑，鏹魔元兇未搵到，已經有人照辦煮碗。狂徒唔止一個，可能係兩個、三個，甚至更多，唔同地盤，各有各掟，有啲可能仲搵緊適當地點同機會「開齋」添。真係愈諗愈得人驚，原來情況比想像中恐怖，下次「空襲」幾時、喺邊度發生，根本冇人知。

煲呔曾提到鏹水彈案，又係「令人氣憤同傷心」嗰句，仲話警方已懸紅一百七十萬緝兇。聽佢嘅口氣，似乎重賞之下，必有奇迹。但講到具體點做，佢就話喺舊樓加裝天眼、鐵閘等，要得到居民同意，資源同部門協調只係次要喎。

嗱嗱嗱，咪又諗住縮沙呀。依家全城人心惶惶，唔止市民出街提心吊膽，商舖亦冇啖好食。當局必須盡快採取有效措施緝兇，天眼「白內障」，盲點多多，市民冇晒信心，問題點解決，總要有個交代。如果仲係唔踢唔郁，唔爆大鑊唔做嘢，鏹魔只會繼續逍遙法外。難怪有廟街小商戶希望：「警方快啲做到嘢啦！」

保安局前幾日話，因為每次都事出突然，搵唔到目擊證人，難以鎖定目標兇徒；仲話如果幾宗鏹水彈案係同一人所為，「呢個人就非常聰明」。講嚟講去，無非想為破案不力推卸責任啫。

叮！有防範好過冇防範，有天眼勝過冇天眼。緝兇固然重要，堵塞保安漏洞同樣迫在眉睫，全港至少有幾百幢大廈冇鐵閘，亦冇裝天眼，閒雜人等可以自由出入，變咗不設防嘅冇掩雞籠，畀不法之徒有機可乘。咁嘅保安漏洞唔堵塞，點防止翻版鏹魔呀？

話到尾，唔係鏹魔非常聰明，而係港府特別無能。呢樣唔做，嗰樣又話唔得，唔通叫市民食自己？計太一叮話齋，經濟好轉就話冇糖派啫，依家鏹水彈空襲預警升級，下個月嘅新財政預算案，每個人派番些少「特別津貼」買鋼盔自保都得啩？叮！