小白觀點：林煥光可接棒搞醜聞

平機會老頂鄧爾邦前排靜雞雞走咗去，呢個政治花瓶真係名副其實係無王管！

哎呀！鄧爾邦呀鄧爾邦，走還走，唔好走得咁鬼祟喎。老實講吖，小白老弟唔太捨得鄧爾邦閣下走㗎，你簡直係我哋寫稿佬嘅再生父母，你正經嘢就唔多理，三日唔埋兩日爆單醜聞出嚟，我靠你老哥都不知賺咗幾多稿費呀！

好彩，跟住平機會變身做退休高官俱樂部，你嘅繼任人林煥光喺搞醜聞方面都有一手，咁至冇咁驚咋。不過好似鄧爾邦你呢啲面皮咁厚嘅人才，查實唔使擔心吖，嚟緊一定大把翻閹機會，話唔定有日閹到做埋特首都唔定呀！到時本報出多十張紙都報道唔晒！

網友觀點...X）...

[　陸克文　]

佢隨風而來，隨風而去，行蹤飄忽，不如將佢嘅「法號」改為隨機主席。

[　小　黃　]

都唔知平機會係乜傢伙，淨係知道佢負面新聞一籮籮。

[　Jun　]

嘩，走得咁鬼祟，一定有啲嘢！趁審計署鬧完話大花筒嘅時候走，仲唔係想卸膊閃咩！

[　芝　芝　]

搞咗盤爛攤子，剩低啲蘇州屎就走人，佢老哥真係勁！

網址：www.sunsiupak.blogspot.com

阿豪觀點：送走鄧爾邦呢個瘟神

鄧爾邦份平機會主席合約終於夠期，市民以為可以燒炮仗送走瘟神？咪咁老定，政府啱啱公布新主席人選係林煥光。乜又係無啦啦爆咗個人選出嚟嘅？到底之前有冇公開遴選㗎？又係黑箱作業嘅話，會唔會又係一擔擔㗎？

其實邊個做都唔緊要，但係原來喺鄧爾邦走頭之後一段時間，先至公布林煥光係繼任人選，咁即係話，平機會擺咗一陣空城計啦！大家不妨睇吓，呢段期間平機會有冇醜聞發生呢？曾經聽人講過，有咩係只有結咗婚先可以做嘅呢？答案就係離婚同搞婚外情。同樣道理，如果冇咗平機會主席呢個位，公帑又邊有咁多機會畀人用嚟環遊世界出席無厘頭會議呀？

網友觀點...X）...

[　小　民　]

政府咁搞法，對其他有志於做主席者，簡直係不公平不平等！佢哋應該去平機會投訴吓！

[　李怒眉　]

平機會呢個爛攤子由邊個接手都是冇眼睇。

[　退休阿伯　]

本人日日喺公園玩雀食老本，真羨慕啲退休高官，財源不絕！

[　老　坑　]

我係老坑，啲退休高官又係老坑，哎，真係同老坑唔同命喇……

網址：www.lukchiho.blogspot.com