香港問題獲得解決，全憑「一國兩制」呢個構思，回歸十幾年，本港對政制問題爭拗多多，都冇人質疑一國兩制。尋日行政會議成員夏佳理出席一個電台節目時講高鐵，話一國兩制之下唔容易實施一地兩檢，跟住竟然衝口而出話：「我耐唔耐都講笑咁講『一國兩制』對香港唔好」，事後，佢好快執生話係朋友嘅意見，政圈人士話佢轉數快，呢下可算代表作。
夏佳理近日頻頻出招撐高鐵，周二開完行會後，佢主動回應財委會再度押後撥款審議，尋日喺電台，講到高鐵一地兩檢問題未解決時，佢又再次護航，但係就不慎失言喇。事後，佢急急澄清：「呢啲係朋友講嘅，唔係我個人睇法。」