牙痛慘過大病，電影發展局主席蘇澤光（Jack So）尋日就係咁，原來佢有牙患，尋日朝早一次過補八隻牙，但佢下晝隨即有個記者會，所以 Jack So一坐低便申報：「我今朝早剝咗八隻牙，所以嘴形硬硬哋，希望大家唔好見怪。」似乎佢畀牙患搞到冇晒心機，補牙都當剝牙辦囉！
Jack So講唔到嘢，個波梗係交咗畀副主席同委員王英偉啦，然後苦埋口面坐喺席上，結果呢個公布電影發展基金嘅記者會，幾乎大都由下屬接招，直至答問環節，先喺必要時發言。
Jack So近年冇做打工皇帝，但公職就愈嚟愈多，佢除咗係電影發展局主席外，仲係貿易發展局主席，又係港區全國政協委員，工作應酬一樣咁忙，所以佢尋晚牙關緊緊，都依然要出席應酬飯局。