鏹水狂魔為患多時，並先後喺旺角、深水埗及銅鑼灣犯案，搞到CNN等多個國際傳媒都有廣泛報道，香港旅遊業同安全形象大受影響。警方前晚雖然拉咗兩個懷疑狂徒，但仲有多宗鏹水彈案未破案，九龍西立法會議員李慧琼（Starry）尋日要求政府加強舊樓保安同搵專人跟進時，就畀煲呔曾曲解為唔使整個「鏹水局長」出嚟。又係嘅，家吓香港地仲嫌官少咩？不如整個「鏹水剋星」實際啲！
連串鏹水彈事件後，市民驚、商戶又冇啖好食，來自重災區嘅九龍西議員Starry就好慨嘆，話留意國際新聞時，只見CNN唯一嘅港聞就係遊客畀鏹水彈灼傷，鏹水事件令香港臭名遠播，要求煲呔曾責成鬍鬚曾撥款幫啲舊區樓宇改善保安，同埋成立跨部門協調小組跟進事件。
煲呔曾遊花園答咗一大輪，旨在話警方啱啱破咗一單案，順便為自己面上貼金，但就唔需要整多個「鏹水局長」出嚟。佢呢個答案真係攞嚟講，市民從嚟都唔支持亂開位，但就期望出街唔使捱鏹雨囉，好心佢督促政府全方位做嘢啦！