財爺鬍鬚曾尋日發表財政預算案諮詢漫畫，內容係一班學生點搞好工程學會，主角穿越時空去咗三國嘅蜀國向諸葛亮取經，條橋大吉利是，故事仲似乎寓意煲呔曾支持度創新低，最好笑嘅係暗數煲呔曾專權霸道、抱殘守缺、勞民傷財等「七宗罪」。
不過千祈唔好以為市民會睇得好開心，因為個古仔仲暗指全港廣大市民係「刁民」，指市民根本無理解過政府嘅壓力同困難就亂咁批評，所以處理預算案時，唔會同「刁民一般見識」喎！故事主角提到派錢減低民怨係「太短視」，睇怕都透露咗鬍鬚曾嘅一啲心聲，市民望穿秋水嘅紓困措施可能都係得個吉。
至於條橋係主角穿越時空去咗三國嘅蜀國向諸葛亮取經，大家都知諸葛亮出師未捷身先死，而蜀國最終係畀人亡國，鬍鬚曾呢本漫畫真係大吉利是又不知所云。