本文重點
高鐵香港段撥款爭議湧現一股新勢力，呢班「80後」年輕人又搞苦行，又搞斷食，元旦遊行闖中聯辦嘅衝突亦話同佢哋有關，呢股勢力令弱勢嘅特區政府倒瀉籮蟹咁，但「80後」都被指為「過激」。「沙士英雄」、中文大學候任校長沈祖堯尋日出席「無止橋慈善基金」開幕禮時直言，呢班青年肯走出來表達意見絕對係好事，亦唔覺得佢哋過激。
七、八十年代學生都絕食
沈祖堯話，只要用積極同和平方式去表達就得嘞，佢話：「七、八十年代都有學生因為釣魚島事件而絕食同貼大字報啦，我唔覺得有乜咁過激喎！」沈教授笑言，雖然自己後生時冇參與過絕食行動，但就認為年輕人咁做可以在校園同社會喚起大家對時事嘅關注。
香港青年聯會主席陳仲尼（Rock）就話，身邊都有啲「80後」嘅朋友，唔能夠將所有「80後」年輕人都標籤為激進。同樣搞青年事務嘅菁英會主席施榮忻就認為，「80後」青年被指花時間喺網絡世界裏浮浮沉沉，如果佢哋肯抽時間返回現實社會，多了解社會及中港兩地問題，問題就會迎刃而解。