降格變咗「曾司長」

踏入新一年，煲呔曾尋日出席本年度首次立法會答問大會，佢早前透露去立法會答問時，隨身有德蘭修女嘅相片，呢個係佢對付長毛梁國雄嘅秘密武器，呢番話早就引嚟不敬嘅質疑，尋日長毛更以其人之道還治其身，用德蘭修女墓誌銘上一句「Love one another as I have loved you」（愛他人就像我愛你一樣）嚟挑戰佢，質疑煲呔曾知唔知點解、出自何經何典。

長毛以為可以狙擊到佢，點知畀煲呔曾指出此話出自《聖經》，係耶穌講過幾次嘅說話，亦係新約舊約最大分界線，不過，煲呔曾嘅書包雖然成功拋窒長毛，但佢繼續解釋呢句說話為「不單只愛你的任何人，還要愛你的敵人……」就畀長毛食住上，話佢當立法會外嘅反高鐵青年係敵人，結果兩個認叻認唔切嘅人都衰咗。

陳淑莊跟住想痛打落水狗，質疑煲呔曾唔敢面對反高鐵青年，但佢提問時兩度嗌煲呔曾做「曾司長」，然後又自己口窒窒咁更正兩次，乜嘢質詢氣勢都冇晒，仲畀高官席上嘅政務司司長同律政司司長玩，佢哋兩個一先一後笑嘻嘻拍拍財政司司長鬍鬚曾，輕聲話：「叫你呀，上去啦！」好似小學生起哄咁。

社民連扮乖挽形象

社民連三子尋日冇喺議事堂搞事，黃毓民話公文袋嘅余若薇嗌佢哋唔好搞，亦有人解釋費事喺五區辭職前搞壞形象，公社兩黨由面左左到忽然合作，一切都係政治啫！黃仲話第日喺補選見到白姐姐唔會發惡鬧女人，但白姐姐對佢一啲信心都冇，仲話，佢唔鬧，但可以嗌堆人嚟鬧我啫。