14/01/2010

播放本新聞相關短片

政情:張建宗練就鐵布衫神功

政府高官嘅訓練中,入門第一課就係問答技巧,所以啲局長喺立法會或記者會上,經常答非所問、答而冇內容,都係訓練有素之故。尋日立法會大會開會,例牌有六條口頭質詢,勞工及福利局局長張建宗一個人包咗四條,佢前後答咗超過一個鐘,啲議員都覺得不着邊際,工聯會嘅潘佩璆忍唔住揶揄張建宗練咗「鐵布衫」。

會上啲議員紛就跨區交通津貼、資助社福機構管治、老人癡呆症患者社區護理,以至老人院舍員工逼院友吃糞事件作跟進,張建宗答得詳盡又長氣,可惜啲議員覺得完全冇料到,潘佩璆窒佢道:「局長真係好似識得鐵布衫咁,點插都插唔入!」

呢句唔知係讚美定係諷刺嘅說話,一啲都冇刺激到張建宗,睇怕啲議員要撬開佢把口,只有搵到罩門破佢嘅護體神功至得囉。