14/01/2010

播放本新聞相關短片

政情:陳維安話留學生太現實

呢排好多國家都受寒流侵襲,英國唔少地方凍到零下十零度,教育局副局長陳維安(Kenneth)啱啱喺呢個時候代孫公出征英國,出席一個教育部長會議,為期一個禮拜。佢嘅活動大部分喺室內,所以都唔使包到實。

去到當地,同啲留學生見面食飯梗係唔少得,Kenneth話依家一般香港留學生都太過現實,最鍾意揀法律、營養師、醫學等專科,所以希望學生選科唔好以搵食為上,反而應該放眼世界。佢除咗出席教育部長會議外,仲會出席主題為「Learning and technology」嘅論壇同埋英國教育科技展。

Kenneth仲去咗倫敦杜莎夫人蠟像館附近嘅中菜館食中餐,試吓嗰邊嘅廚藝,令佢印象尤深嘅菜式係日本芥末蝦餃,呢款食品嘅餡料加入咗日本芥末,連蝦餃皮都有日本芥末嘅味道,真係幾獨特㗎。