全球氣候反常，一陣話暖化，一陣又話冰河時期，科學家都各有各說。港產氣候專家劉雅章教授就話，冰河時期只係周期性，但都有二十至三十年，長遠而言仍阻擋唔到全球暖化大趨勢。即係話，北半球可能有二十至三十年嘅冬天會好凍。
劉雅章教授係土生土長嘅香港人，一九七四年畢業於中文大學物理系，後來赴美深造，又喺普林斯頓大學任教過，家吓係美國國家海洋和大氣管理局首席科學家，尋日佢應中大邀請回港主持講座，大講對氣候嘅心得。佢話，受北極震盪影響，今個冬天歐美地區非常嚴寒，地球的確進入冰河時期，但冰河時期周期只有二十至三十年，即短期內可抵銷氣候暖化。不過北極震盪只影響北半球，北半球嘅區域會好凍，南半球卻好熱。
哥本哈根氣候會議以失敗告終，劉雅章話：「全球都已關注呢個問題，作為科學家，我已做咗應做嘅事，下一步則留待更聰明嘅政治家去做。」