「八十後」年輕人高調反對廣深港高鐵工程撥款，令政府相當頭痕。「庸官殺手」王永平警告，如果政府再唔妥善解決貧富懸殊同年輕人出路問題，「八十後」將會變成計時炸彈，激進抗爭情緒更可能延伸到貧窮階層，屆時社會深層次矛盾將一發不可收拾，佢仲話：「高鐵撥款過到又點吖，遲吓又有泛民主派五區總辭，睇怕有排搞囉！」咁樣落去，煲呔曾真係腳痛落台都似。
平叔解釋話，「八十後」年輕人多達一百萬人，但出路就唔多，佢仲針對政府官員嘅表現太差：「政府應該多啲同『八十後』班年輕一代溝通，政府好多AO（政務官）都係『八十後』，又好似陳智遠（衞生及福利局政治助理）都係『八十後』啦，好應該出去同啲『八十後』溝通吓，了解年輕人嘅需要嘛！」平叔又寸爆咁話，政治助理有十三萬月薪又使乜激進吖！
講到深層次矛盾，佢話貧富懸殊令基層市民怨氣增加，加上政府處事經常被指官商勾結，怨氣就愈積愈多，容易被「八十後」激進情緒影響，激發上街示威抗議政府，到時引發管治危機會更麻煩。