立法會議事被指愈嚟愈流於口舌之爭同粗鄙化，尋日開大會，社民連嘅「大舊」陳偉業同專業會議嘅梁美芬喺要求內地釋放劉曉波嘅辯論中又起爭拗，大舊更爆出一句「有啲教狗屎法律嘅人……」，搞到梁美芬當場抗議，結果累到立會停會二十五分鐘，仲有六名議員退場抗議添。睇嚟，議會議事要有效率，今後要掛個「嚴禁狗屎」牌先得囉！
尋日好多建制派議員都冇參與辯論，但梁美芬就好勇咁話唔認同立法會就內地事務進行表決，結果引嚟大舊一句「有啲教狗屎法律嘅人要先搞清楚法律問題」。係人都知，成個議會只得一個議員喺大學教法律，梁美芬於是即時要求主席裁決。
主席宣布休會重聽錄音帶，最後裁決大舊嘅言論雖然有冒犯性，但並冇指明邊位議員，所以冇違反議事規則。梁美芬卻斥言論含沙射影，唔使指名道姓都有冒犯性，仲即時同何鍾泰、石禮謙、劉秀成、謝偉俊及黃宜弘離場抗議，並聯署去信主席表達不滿。
梁美芬離場後眼濕濕咁話，大舊嘅冒犯性言論誣衊其個人專業，更斥責：「議會之所以有人掟嘢同講粗口，唔多唔少都係主席一手造成，執行議事規則過於寬鬆，裁決有雙重標準。」