本文重點
政壇人士沾上緋聞真係可大可小，啱啱獲委任做平等機會委員會新任主席嘅特首辦前主任林煥光重投公職，執掌處理性騷擾、性別歧視嘅機構，政圈中人都話可視為洗底成功。不過，唔少立法會議員都狠批佢嘅任命係煲呔曾益「自己友」、「AO治港」嘅結果。各種批評聲浪中，政圈新緋聞男、白鴿黨甘乃威就話，林煥光嘅私人事務唔應該影響佢做公職。甘威咁瞓身為林煥光擋箭，到底係為人定係為自己㗎？
林煥光五年前做特首辦主任時被揭同紅顏知己外遊日本，其後佢辭職，喺盛年絕迹官場，今次回歸重要公職，如能收拾平機會嘅爛攤子，將來喺公營機構任高職嘅角色就打風都打唔甩啦。尋日佢講起當年事，都畀人走出陰影嘅感覺。
不過，好多人都針對佢嘅前高官身份嚟批評，甘威初時都話好擔心「AO治港」日益嚴重，最後搞到所有半官方機構都成為前高官俱樂部，變相冇咗應有嘅獨立地位；但問到林煥光嘅緋聞影唔影響佢處理女性性騷擾嘅投訴時，甘威即面露尷尬，仲掉轉頭撐林煥光，吞吞吐吐咁話婚外情只係佢嘅私人事務，相信唔會影響佢嘅工作表現喎！態度大變，都唔知係咪諗起自己嘅「好感風波」。
譴責動議有懸念
講開甘威，近日風傳五區總辭後，泛民陣營少五票，到時立法會審議調查報告時泛民唔夠腳，甘威遭譴責嘅機會可能大增，呢個緋聞男真係有排震。亦有有心人計過票，話立法會通過譴責動議需要三分之二票，五十五個議員嘅有效票係唔少於三十六票，早前謝偉俊已表態唔支持查，主席又唔會投票，恐怕都好難過到譴責案。最後甘威會唔會好似林煥光咁甩難？好難講。