14/01/2010

播放本新聞相關短片

博客擂台:最.筍.工賣年糕

一個全新的報上部落格,每日與你暢談社會至Hit話題,剖析問題所在。

小白觀點:冇工好得過釣烏龜

有慈善機構推出臨時筍工,賣三粒鐘年糕薪酬有三張金牛,筍到不得了,真係希望一年四季都有年糕賣!

計我話,呢份工直情好過喺澳洲大堡礁看住個爛鬼島。你知啦,喺個島上面真係幾悶㗎,至少肯定唔會有隻雀仔叼支鏹水,再喺半空掟落嚟咁緊張刺激。話唔定隨時好似美劇《Lost》咁,有個極似醫管局CEO蘇利民嘅奸角阿Ben出嚟逐個捉添,咁就麻煩咯。

不過大家唔好咁冇大志,賣年糕同做大堡礁看更有排未算最筍。嗱,你睇吓有啲噏唔出名嘅弱台奀星,月入八千之嘛,但可以住豪宅,久唔久又可以晒吓喺日本掃番嚟嘅戰利品。所以呢,有乜工好過釣烏龜吖?

網友觀點......

小黑

賣唔晒係咪要自己包銷先?

少年警訊

好明顯係一個騙局!待業人士要小心!

肥仔武

我就唔信喇,係咪做完之後要捐番五千出嚟先?

劉太太

嘩,咁啲年糕咪好貴囉,點會買呀?

網址:www.sunsiupak.blogspot.com

阿豪觀點:宣傳慈善無可厚非

有慈善機構同商界合作推出臨時筍工,喺商場落嘴頭賣年糕,三粒鐘就可以三千銀,據說比天下第一筍工大堡礁管理員仲好賺。

香港地籠屋平均租金高過豪宅就有啫,幾時見過基層市民有筍工?應該拍爛手掌啦,但唔知點解,雖然呢份工講到明係幫慈善機構嘅,但好多人都質疑佢哋做媒甚至係博宣傳。幾時開始一個二個變得咁陰謀論㗎?人哋都講明係做三粒鐘咁大把,所以成本都係有限啫,況且如果真係慈善嘅話,用呢招嚟宣傳吓,等大家共襄善舉,都無可厚非吖。

話時話喎,如果香港人個個都精叻,就唔會有寶藥黨,亦唔會有人走去性交轉運啦!

網友觀點......

失業漢

九成係啲商界博宣傳啦!好似立法會議員一樣,耐唔耐做吓show,畀市民當笑料娛樂吓!

孔乙己

點解唔將筆錢分多幾份,畀多幾個人做?每人五百蚊,多啲人受惠仲好啦!

便宜莫貪

我都覺得係宣傳居多,對推動就業完全冇幫助,係咁意使三千蚊,就有咁多人報道,抵晒啦!

口水男

多啲咁筍嘅工,想「80後」激都難。

網址:www.lukchiho.blogspot.com

發表方法

讀者如對本欄每日話題有任何意見,歡迎登入網址發表意見。本報保留採用刊登權利,不另作通知,敬請留意。

明日主題

平機會玩空城計