首批五十萬劑豬流感針，儘管煲呔曾率領高官使出渾身解數，合力擔綱努力演出，可惜自從負面新聞不斷見報後，尤其「醫生都領嘢」，在「唔打又驚、打更驚」的骨牌效應下，一眾醫療權貴又說不出個所以然，市民疑惑未解，自然冇人肯做勇敢的白老鼠。

根據最新數字，只有十二萬人注射了豬流感疫苗，而且大多數是高危的長者，孕婦只有八百多人，醫護人員只得七千多人注射，佔醫療隊伍一成左右。有立法會議員言詞閃爍，又話自己身體好，又話怕痛，除非打一針可以永久免疫，才考慮打！這正如一位女子向求婚的癡男說：除非嫁給你可以保證永遠幸福，才考慮結婚！這不是廢話是甚麼？

首批豬流感疫苗仍剩下近四十萬劑，第二批二百五十萬劑即將運到！周一鑊出來講嘢嘞，但見他一臉沮喪，三分無奈、七分委屈的說：都買咗咯！政府筆錢又畀咗……希望拓展到小學生及其他健康人士！

看官，如今你知道乜嘢叫做腦殘了吧！周局長，世上好多嘢並非你送就有人要！如果你有能力把疫苗變成蜜汁叉燒飯又唔同！或者將接種疫苗變成一種信仰，則三百萬劑豬流感疫苗很快就可以打完！