呢份工鄧爾邦做成點，大家都心知肚明。佢正經事做唔到，負面新聞就一籮籮，例如未經政府批准，就用公帑為自己買七百萬保額嘅人壽保險；平時不務正業，一年到尾飛嚟飛去，連非洲人權會議都去湊熱鬧，而且出親去就亂花公帑，十足大花筒，去北京出差，居然住每晚二千八百幾蚊嘅「大使套房」。

對於鄧爾邦嘅劣行，審計署猛烈批評過，立法會表示過「極度遺憾」，連平機會委員都籠裏雞作反，要求佢自動消失。不過佢勝在面皮厚，賴死唔肯走。

之不過，鄧爾邦名聲咁臭，政府都唔敢再留佢，舊年九月就話要招聘平機會主席，擺明要將佢叮走。當時政府登咗招聘廣告，仲係威係勢成立咗遴選委員會，話就話公開招聘，其實由頭到尾都係黑箱作業。有議員踢爆，政府一早已經有內定人選，所謂招聘及遴選純屬表面工夫。

身為平機會老頂嘅政制及內地事務局局長林瑞麟就死撐，話絕對唔會有內定人選。林公公實牙實齒保證，遴選委員會一定會按客觀準則，公正處理所有申請，從中搵出最適當人選咁話。不過冇人知道遴選過程係點嘅，亦唔知有邊啲候選人。近日有人放出風聲，話遴選委員會已經喺九十幾個人選當中，經過多輪遴選，確定咗新主席嘅人選。

平機會主席年薪二百幾萬，薪高糧準，咁嘅筍工有幾十人申請一啲都唔奇，不過，話政府冇內定人選，會依足程序做，就打死都冇人信嘞。

呢種事都唔係第一次發生喇，當日財政司司長曾俊華任命金管局新總裁，一早就內定由前特首辦主任陳德霖出任，但偏偏要做番場大龍鳳，成立乜嘢遴選小組，仲話喺幾十個人選中搵咗八個候選人，最後先至選定陳德霖。搞笑嘅係，嗰啲所謂候選人根本唔知自己曾經被列入名單。

叮佢個鎯鎯，所謂公營機構不嬲都係退休高官俱樂部，無論點選法，最後都係圍內人做番。太一叮敢打賭，今次一定又係近親繁殖。

奇怪嘅係，政府遲遲仲唔公布新主席人選。平機會群龍無首，有員工擔心，遇上突發事件都唔知點算。不過，使乜咁勞氣噃，呢幾年鄧爾邦成日做離岸主席，平機會咪照樣存在。其實莫講話主席未上任啦，就算成個平機會停晒工，照樣唔會有問題。即係話，呢個政治花瓶根本就係多餘嘅，執笠都死不足惜。叮！