身兼中大校長嘅行政會議非官守成員劉遵義（膠樽義），日前同會計師麥嘉軒結婚，一切都低調進行，而尋日係膠樽義行政會議放完聖誕新年假後復會嘅日子，佢並冇因為新婚而偷懶，亦有去政府總部開會。
六月卸任中大校長
呢次會一開就開足兩粒鐘，散會後見膠樽義行出嚟精神奕奕。眾所周知，膠樽義喺今年六月會卸任中大校長一職，距離依家仲有成五個月，問佢會唔會忙到卸任後先至有時間honey moon（蜜月），佢即刻笑笑口咁話：「希望唔使啦！」
言下之意即係唔想拖咁耐，最好盡快落實蜜月之旅，萬一冷落嬌妻就唔好啦！不過，兩夫妻暫時都未計劃好度蜜月嘅地點，話一切仍然喺研究當中。