建制派嫌卿姐未死得，尋日踩多一腳，行會召集人梁振英、成員夏佳理同張炳良忽然間好有團隊精神，一人一句話相信財委會做事要負責任，間接叫卿姐醒定啲，唔係就要承擔責任孭鑊。

財委會呢個禮拜五再開波，卿姐點樣解圍，成為高鐵撥款大戰嘅另一個攻防戰場。卿姐嘅拆解招數，就係借立法會秘書處過橋卸力，將主持會議嘅部分重責外判畀秘書長Pauline吳文華。

好似決定開會以十粒鐘為限，而非政府原先嘅「最壞打算」二十八粒鐘，強調係根據秘書長嘅評估作決定；其他仲包括會唔會接納班「八十後」嘅要求，喺立法會裝直播電視屏幕同准許臨時借電，亦一律拋波由Pauline解答，咁就算議員或者示威者有不滿，都真係干「卿」底事嘞。卿姐呢招金蟬脫殼，都幾高招喎！不過，聞說秘書處都有怨氣，擔心拉布議員未必肯合作，代價更加係破壞秘書處嘅中立地位。